Atgofion o 70 mlynedd o hanes Felindre yn cael eu harddangos mewn arddangosfa gelf newydd

23 Medi 2026

Mae arddangosfa gelf newydd sydd yn dathlu hanes Gwasanaeth Canser Felindre wedi cael ei gosod yng Nghanolfan Ganser Felindre fel rhan o ymgyrch i nodi ei phen-blwydd yn 70 oed.

Mae'r arddangosfa yng Nghaerdydd wedi cael ei chreu mewn partneriaeth â’r rhaglen Celfyddydau mewn Iechyd, i archwilio'r bobl, y lleoedd a'r momentau arbennig sydd wedi siapio Felindre dros y degawdau. Mae'n rhan o'r ymgyrch pen-blwydd, o’r enw 'Yn falch o'n gorffennol, yn gyffrous am ein dyfodol'.

Mae'r ymgyrch yn dathlu saith deg mlynedd o ofal, arloesedd, ymchwil a thosturi ac ar yr un pryd, yn helpu i greu cyffro ynghylch symud i’r Ganolfan Ganser Felindre newydd yn nhymor y Gwanwyn 2027.

Mae'r arddangosfa'n cynnig cyfle unigryw i fyfyrio ar hanes y gwasanaeth, ac yn edrych ymlaen at ei ddyfodol trwy luniau, straeon personol a deunydd hanesyddol. Mae'n cynnwys detholiad o luniau gan David Collyer a straeon a gasglwyd gan Jude Rogers, sy'n arddangos yr ysbryd a'r gymuned sydd wedi dod yn gyfystyr â Felindre.

Meddai Sally Thelwell, Cydlynydd Celfyddydau ac Iechyd yng Ngwasanaeth Canser Felindre: "Mae ein rhaglen Celfyddydau mewn Iechyd yn bodoli oherwydd ein bod yn gwybod bod gofal iechyd yn ymwneud â llawer mwy na thriniaeth yn unig. Gall prosiectau creadigol helpu pobl i gysylltu a dod o hyd i gysur yn ystod cyfnodau anodd. Mae'r arddangosfa hon yn dathlu nid yn unig hanes Felindre ond hefyd, gwerth y bobl sydd wedi'i siapio.

"Wrth i ni nodi 70 mlynedd o Wasanaeth Canser Felindre, mae'r arddangosfa hon yn darparu lle i gleifion, teuluoedd, staff ac ymwelwyr oedi, cofio a dathlu'r gymuned eithriadol sydd wedi datblygu yma."

Mae llawer o’r deunydd yn deillio o’r prosiect Moving House, a gasglodd atgofion a myfyrdodau gan gymuned Felindre wrth iddi baratoi i symud i’r ganolfan ganser newydd.

Meddai Kate Hammond, Uwch Reolwr Ymgysylltu yng Ngwasanaeth Canser Felindre: "Crëwyd y prosiect Moving House i gofnodi'r straeon, yr atgofion a'r profiadau syd yn gwneud Felindre yn unigryw wrth i ni baratoi i symud. Roedden ni eisiau gwybod beth oedd pobl yn teimlo oedd fwyaf pwysig i fynd gyda nhw i'n pennod nesaf.

"Yr hyn a ddaeth yn amlwg yn gyflym oedd mai nid am adeiladau oedd pobl yn siarad. Roedden nhw'n siarad am gyfeillgarwch, caredigrwydd, teuluoedd, datblygiadau, chwerthin, cefnogaeth, a chymaint mwy. Mae’r straeon personol hynny wrth galon yr arddangosfa, ac yn helpu i gadw rhan bwysig o hanes Felindre yn fyw.”

Bydd yr arddangosfa’n parhau i gael ei harddangos yng Nghanolfan Ganser Felindre tan y byddwn yn symud i’r ganolfan ganser newydd, ac yn rhoi cyfle parhaol i gleifion, teuluoedd, staff ac ymwelwyr i ymgysylltu â hanes y gwasanaeth.

Mae'r ymgyrch pen-blwydd yn gwahodd pobl i gyfrannu eu hatgofion a'u lluniau eu hunain hefyd, fel rhan o archif gynyddol sy'n dathlu 70 mlynedd o Wasanaeth Canser Felindre.

Gall aelodau’r cyhoedd, cyn-staff a staff presennol, gwirfoddolwyr, cleifion, teuluoedd a chefnogwyr rannu eu straeon drwy’r dudalen we bwrpasol ar gyfer y pen-blwydd. Dyma sut y gallwch chi gymryd rhan.

Ynghylch Gwasanaeth Canser Felindre

Mae Gwasanaeth Canser Felindre yn darparu gofal canser arbenigol i fwy na 1.5 miliwn o bobl ar draws de ddwyrain Cymru a thu hwnt. Fel rhan o Ymddiriedolaeth GIG Prifysgol Felindre, mae gwasanaethau’n cael eu darparu trwy fodel ‘prif ganolfan a lloerennau’, gyda Chanolfan Ganser Felindre yn gwasanaethu fel canolfan driniaeth, addysgu ac ymchwil arbenigol ar gyfer oncoleg anfeddygol.

Mae Gwasanaeth Canser Felindre yn darparu ystod eang o driniaethau, gan gynnwys cemotherapi, triniaethau gwrth-ganser systemig (SACT), radiotherapi a gofal lliniarol arbenigol. Drwy ddysgu, arloesi, ymchwil a gwella gwasanaethau, mae'r gwasanaeth wedi ymrwymo i ddarparu gofal o'r ansawdd uchaf i gleifion a theuluoedd ar draws Cymru.