Mae Miss Cymru yn galw ar gymunedau ledled Cymru i roi 'yr anrheg orau' i rywun y Nadolig hwn ar ôl derbyn trallwysiadau gwaed achub bywyd

"Rwy'n ddiolchgar iawn i'r rhai sy'n rhoi o'u hamser i helpu eraill mewn angen. Yn anffodus, ni allaf roi gwaed nawr ar ôl cael trallwysiadau, ond rwy'n gobeithio, trwy rannu'r gwahaniaeth a wnaeth i mi yn bersonol, y gallai annog mwy o bobl i ystyried rhoi gwaed. Mae’n gallu newid bywyd rhywun go iawn."

Mae Darcey, sydd â threftadaeth Jamaicaidd trwy ei thad, yn ymgyrchydd dros hawliau pobl ddu, ac yn hyrwyddo amrywiaeth yma yng Nghymru ochr yn ochr â'i gwaith pasiant. Gyda dathliadau'r Nadolig yn prysur agosáu, mae Miss Wales yn cefnogi ymgyrch Gwasanaeth Gwaed Cymru, #thebestgift.

Mae'r ymgyrch yn annog cymunedau ar draws Cymru i gefnogi stociau gwaed dros gyfnod y Gaeaf drwy godi ymwybyddiaeth o’r pwysigrwydd o roi gwaed, platennau neu fêr esgyrn, a'r gwahaniaeth y mae'r rhoddion gwerthfawr hynny'n ei wneud i gleifion mewn angen fel Darcey.

"Buaswn yn annog pawb sy'n gymwys i gefnogi Gwasanaeth Gwaed Cymru, yn enwedig y rhai o gefndir Du, Asiaidd, Cymysg neu Leiafrifoedd Ethnig. Drwy ddod ymlaen, rydych chi wir yn helpu cleifion mewn angen, ac yn darparu amrywiaeth i'r panel rhoddwyr, a fydd yn helpu nifer fwy o gleifion."

Mae'r Gwasanaeth yn darparu cynnyrch gwaed a gwaed sy'n achub bywydau i 19 o ysbytai ar draws Cymru ac i bedair awyren Ambiwlans Awyr Cymru i'w defnyddio mewn argyfwng. Mae’r Gwasanaeth yn rheoli Cofrestr Rhoddwyr Mêr Esgyrn Cymru hefyd, sy'n recriwtio ac yn cefnogi gwirfoddolwyr mêr esgyrn sydd yn cael eu cydweddu â chleifion canser ar draws y byd i roi rhodd mêr esgyrn a allai achub bywydau.

Ar hyn o bryd, nid yw tri o bob deg claf sydd angen trawsblaniad mêr esgyrn yn dod o hyd i rywun sydd yn cydweddu â nhw, ac mae'r risg o beidio â dod o hyd i roddwr yn cynyddu i saith o bob deg ar gyfer cleifion o dreftadaeth lleiafrifoedd ethnig, oherwydd diffyg cynrychiolaeth ar gofrestri rhoddwyr byd-eang.

Dywedodd Alan Prosser, Cyfarwyddwr Gwasanaeth Gwaed Cymru:

"I gleifion sydd angen gwaed, rhodd o waed fydd 'yr anrheg orau' maen nhw'n ei derbyn y Nadolig hwn. Rhaid paratoi'r Gwasanaeth, felly rydym yn estyn allan i'n cymunedau ar draws Cymru, yn eu hannog i roi rhodd achub bywyd dros gyfnod y Gaeaf, ac i'r rhai rhwng 17 a 30 oed i gofrestru hefyd i gael eu rhoi ar ein cofrestr mêr esgyrn."

Mae gan waed a chynnyrch gwaed, sydd eu hangen i gefnogi cleifion ac achub bywydau ar draws Cymru, fywyd silff fer, ac mae ysbytai eu hangen bob dydd, gan gynnwys yn ystod gwyliau banc fel Dydd Nadolig a Dydd Calan.