Mae Dr Susanna Whawell yn ymuno â Bwrdd Ymddiriedolaeth GIG Prifysgol Felindre

14 Mai 2024

Mae Ymddiriedolaeth GIG Prifysgol Felindre wedi croesawu penodiad Dr Susanna Whawell yn Aelod Annibynnol Cyswllt newydd o'r Bwrdd.

Mae Dr Whawell yn ymuno â Felindre gyda dros 20 mlynedd o brofiad yn y gadwyn gyflenwi a logisteg ar draws amrywiaeth o gwmnïau blaenllaw a rhyngwladol.

Nod Bwrdd yr Ymddiriedolaeth yw goruchwylio'r system lywodraethu a rheoli, gan gynnwys rheoli risg. Mae hyn yn golygu bod y Bwrdd yn gwneud penderfyniadau ynglŷn â'r ffordd mae pethau'n gweithredu a sut i gadw staff a chleifion yn ddiogel. Mae'n gwneud hynny trwy gyfarfod mewn llawer o wahanol grwpiau sy'n canolbwyntio ar feysydd gwahanol o weithrediadau'r Ymddiriedolaeth. Yr enw ar hyn yw 'pwyllgorau'.

Fel aelod annibynnol, rôl Dr Whawell fel Aelod Annibynnol Cyswllt fydd cyfrannu ei sgiliau a’i harbenigedd ar draws amrywiaeth eang o feysydd. Ar ôl gweithredu systemau integredig yn llwyddiannus mewn sefydliadau o bob maint, bydd cefndir ac arbenigedd Dr Whawell yn dwyn llawer o fanteision i Felindre.

Wrth siarad am y penodiad newydd i Felindre, meddai Dr Whawell:

"Rwy'n falch iawn o ymuno â Felindre, ac rwy'n edrych ymlaen at wneud cyfraniad cadarnhaol at weithgareddau'r Bwrdd."

Yn ogystal ag archwilio rheolaidd, mae Dr Whawell yn academydd ymchwil ac yn adolygydd, ac mae ei diddordebau academaidd yn ymwneud â rhyngwyneb systemau dynol a goresgyn rhwystrau rhag gweithredu a defnyddio systemau yn llwyddiannus.

Mae Dr Whawell hefyd yn addysgu'n rhan-amser yn Ysgol Fusnes Manceinion, ac mae hi hefyd yn addysgu cyrsiau i Archwilwyr Arweiniol ar gyfer corff hyfforddi achrededig Cofrestr Ryngwladol yr Archwilwyr Tystysgrifedig (IRCA).

Yn ei hamser hamdden, mae Dr Whawell yn gwirfoddoli gyda Chymdeithas y Lluoedd Awyr Brenhinol (RAFA) i gefnogi cyn-filwyr, ac mae’n mwynhau chwarae’r sacsoffon yn rhan o gerddorfa sacsoffon.