Ein Cyfarwyddwr Gweithredol Dros Dro newydd ar gyfer Nyrsio, Gweithwyr Proffesiynol Perthynol i Iechyd a Gwyddor Iechyd

10 Ebrill 2026

Mae Ymddiriedolaeth GIG Prifysgol Felindre yn falch o gyhoeddi mai Gillian Knight sydd wedi ei phenodi'n Gyfarwyddwr Gweithredol Dros Dro ar gyfer Nyrsio, Gweithwyr Proffesiynol Perthynol i Iechyd a Gwyddor Iechyd.

Mae Gill yn nyrs gofrestredig a chanddi yrfa sy'n ymestyn dros 35 mlynedd. Yn ystod honno, mae hi wedi meddu ar rolau uwch arweinyddiaeth ym meysydd ymarfer clinigol, addysg, rheoli a pholisi. Gyda chefndir cryf mewn gofal canser, mae hi wedi gweithio ar draws amrywiaeth o sectorau gofal yn y GIG, y Grŵp Cydlynu Gwasanaethau Canser, y trydydd sector, Rhwydwaith Canser Cymru a Llywodraeth Cymru.

Ym mis Ionawr 2018, symudodd Gill i rôl lywodraethol yn Swyddog Nyrsio, gyda ffocws ar y gweithlu a rheoleiddio a chafodd ei phenodi'n Ddirprwy Brif Swyddog Nyrsio ym mis Ebrill 2025. Yn y rôl honno, roedd hi'n cefnogi'r Prif Swyddog Nyrsio drwy arwain meysydd polisi allweddol, gan gynnwys rheoleiddio'r Comisiwn Meddygol Cenedlaethol, addysg, tyfu'r gweithlu, a datblygu strategaeth nyrsio a bydwreigiaeth broffesiynol gan weithio ar draws y system ar waith gweithredu.

Mae Gill wedi bod yn ganolog o ran gweithredu Deddf Lefelau Staff Nyrsio (Cymru) 2016 ac ategu polisi ar gyfer cyflwyno rôl y Cydymaith Nyrsio Cofrestredig yng Nghymru. Mae ei hymrwymiad i ddatblygu'r maes nyrsio byd-eang yn cael ei adlewyrchu yn ei gwaith parhaus gyda sefydliadau'r trydydd sector.

Wrth siarad am y penodiad newydd, meddai Gill:

"Rwy'n edrych ymlaen yn fawr at ymuno â Felindre ac i weithio gyda chymuned rhagorol o weithwyr proffesiynol ym maes nyrsio, meysydd perthynol i iechyd a gwyddor iechyd. Mae uchelgais, arbenigedd ac ymrwymiad Felindre i gleifion yn amlwg, ac rwy'n edrych ymlaen at weithio gyda thimau i ddatblygu ar y cryfder hwnnw, gan hybu arloesi, arweinyddiaeth broffesiynol, a gofal rhagorol sy'n canolbwyntio ar y person."

“Rwy’n frwdfrydig dros greu’r amodau lle mae staff yn teimlo eu bod yn cael eu gwerthfawrogi, eu cefnogi a’u grymuso i ddarparu’r gorau oll i bobl ledled Cymru.”

Meddai Carl James, Prif Weithredwr Dros Dro:

“Mae'n braf iawn gallu croesawu Gill i Felindre. Mae hi’n dod â phrofiad eithriadol o eang, gyda phroffil cenedlaethol cryf ac ymrwymiad clir i ragoriaeth mewn gofal canser.

"Rwy'n edrych ymlaen yn fawr at weithio gyda hi'n rhan o'n tîm gweithredol yn ystod y cyfnod pwysig hwn i'r sefydliad."