Helpu i atal heintiau rhag lledaenu wrth i achosion firysau'r gaeaf godi

Mae nifer yr achosion o firysau’r gaeaf gan gynnwys y ffliw, norofeirws, y coronafeirws a’r feirws syncytiol anadlol (RSV) yn cynyddu ar draws de Cymru.

I bobl sydd â chyflyrau iechyd presennol, ac yn enwedig y rhai sy'n cael triniaeth sy’n gallu effeithio'n andwyol ar allu eu system imiwnedd i ymateb, gall firysau achosi cymhlethdodau difrifol iawn.

O ganlyniad, er mwyn cadw’ch hun, ein cleifion eraill a’n staff mor ddiogel â phosibl ac i atal heintiau rhag lledaenu, rydym yn cyflwyno’r mesurau canlynol ar draws safleoedd Gwasanaeth Canser Felindre ar unwaith:

Peidiwch â mynd i unrhyw un o safleoedd Gwasanaeth Canser Felindre os oes gennych symptomau haint anadlol neu symptomau norofeirws – mae hyn yn berthnasol i gleifion a pherthnasau / ymwelwyr. Mae rhagor o wybodaeth am y symptomau hyn ar wefan y GIG (Saesneg yn unig).
Os oes apwyntiad gennych yn Felindre ond mae gennych symptomau, cysylltwch â'r adran rydych i fod i fynd iddi er mwyn cael cyngor. Os ydych chi’n cael triniaeth cemotherapi neu imiwnotherapi, cysylltwch ag ysgrifennydd eich ymgynghorydd am gyngor.
Os ydych chi'n cael triniaeth cemotherapi, imiwnotherapi neu radiotherapi gyda ni ac os oes gennych chi symptomau firaol ac yn teimlo'n sâl neu os oes gennych chi dymheredd, mae croeso mawr i chi gysylltu â'n llinell gymorth 24/7 am gyngor.
Os byddwch chi’n dod i un o safleoedd Gwasanaeth Canser Felindre fel claf neu ymwelydd, gwisgwch fasg wyneb os yw’n bosibl – bydd y rhain ar gael wrth y prif fynedfeydd. Gwnewch yn siŵr hefyd eich bod chi’n golchi eich dwylo cyn dod i mewn. Eto, bydd diheintydd dwylo ar gael wrth bob mynedfa.
Ffordd allweddol o leihau'r risg o ledaenu heintiau yw lleihau nifer y bobl sy'n dod i’r safle. Rydym felly’n gofyn i bob claf ddod â dim mwy nag un ymwelydd i unrhyw apwyntiad fel claf allanol. Os ydych yn credu bod amgylchiadau eithriadol gennych, siaradwch ag uwch aelod o’r staff. Ar gyfer ward y cleifion mewnol, bydd cyfyngiad llym o ddim mwy nag un ymwelydd i bob claf ar unrhyw un adeg. Bydd eithriadau i hyn yn dibynnu ar wahanol sefyllfaoedd. Os oes unrhyw bryderon gennych, siaradwch â'r nyrs wrth y llyw. Bydd gofyn hefyd i ymwelwyr wisgo masg wyneb tra byddant ar ward y cleifion mewnol ac ym mhob ardal glinigol yn y ganolfan ganser.

Bydd y mesurau uchod ar waith o ddydd Mawrth 31 Rhagfyr 2024 hyd nes cewch wybod yn wahanol.

Wrth roi gwaed neu gynhyrchion gwaed, er mwyn cadw eich hunain, rhoddwyr eraill a’n staff mor ddiogel â phosibl ac i atal heintiau rhag lledaenu, byddem yn ddiolchgar am eich cymorth gyda’r canlynol:

Peidiwch â dod i unrhyw un o'r clinigau os oes gennych unrhyw symptomau o haint (mae rhagor o wybodaeth ar gael ar wefan y GIG [ar gael yn Saesneg yn unig]). Cysylltwch â ni i roi gwybod.
Peidiwch â dod i roi unrhyw waed nes bod eich symptomau wedi gwella. Os ydych wedi cael y ffliw neu haint ac mae angen gwrthfiotigau arnoch, ddylech chi ddim rhoi gwaed am 14 diwrnod ar ôl gwella neu 7 diwrnod ar ôl cwblhau'r gwrthfiotigau – p'un bynnag sydd gyntaf. Os ydych wedi cael annwyd (e.e. dim ond symptomau dolur gwddf, peswch sych neu drwyn sy’n rhedeg) gallwch roi gwaed cyn gynted ag y bydd eich symptomau wedi gwella.
Defnyddiwch ddiheintydd dwylo cyn mynd i mewn i'r clinig. Bydd y rhain ar gael wrth y prif fynedfeydd.
Bydd masgiau wyneb ar gael tra byddwch yn y clinig os ydych yn dymuno eu gwisgo, ond nid yw'r rhain yn orfodol. Caiff ein staff hefyd wisgo masg wyneb, ond nid yw hynny'n orfodol chwaith.

Diolch am eich cymorth i gadw ein gwasanaethau mor ddiogel â phosibl.