Cyhoeddi Prif Weithredwr newydd Ymddiriedolaeth GIG Prifysgol Felindre

13 Medi 2024

Mae’n braf gan Ymddiriedolaeth GIG Prifysgol Felindre gyhoeddi fod Mr David Donegan wedi ei benodi’n Brif Weithredwr parhaol newydd.

Ar hyn o bryd, David yw Prif Weithredwr Cork University Hospitals Group (CUH Group), sy’n cynnwys yr ysbyty addysgu trydyddol mwyaf yn system iechyd Iwerddon, nifer o ysbytai cyffredinol dosbarth ac ystod o glinigau a chyfleusterau cymunedol. Mae David wedi llwyddo i gyflawni gwell perfformiad, seilwaith, llywodraethiant ac arweinyddiaeth yn CUH Group, a hynny’n glinigol ac yn weithredol. Mae hefyd wedi arwain y gwaith o gyflawni nifer o raglenni cenedlaethol yn ne-orllewin Iwerddon, gan gynnwys y strategaeth trawma genedlaethol a’r rhaglen rheoli canser genedlaethol.

Er yn wreiddiol o Iwerddon, mae wedi treulio’r rhan fwyaf o’i yrfa yn y GIG, gan gynnwys dros ddegawd mewn rolau ar lefel bwrdd mewn awdurdodau iechyd strategol, ysbytai acíwt a gwasanaethau ambiwlans yn Lloegr. Mae hefyd wedi bod yn Gyfarwyddwr Dros Dro ar Ofal Eilaidd ym Mwrdd Iechyd Prifysgol Betsi Cadwaladr yng Nghymru.

Ac yntau’n glinigydd o ran ei gefndir, mae David yn hynod o frwdfrydig dros arweinyddiaeth glinigol ac ymarfer pellach. Mae ganddo sawl gradd, gan gynnwys MBA Gweithredol o Ysgol Fusnes Warwick, ac mae’n raddedig o Academi Arweinyddiaeth y GIG a Rhaglen Uwch-arweinwyr UCL.

Mae David yn briod â Nuala, sy’n Gyfarwyddwr ar Kantar Worldpanel.

Meddai Cadeirydd yr Ymddiriedolaeth, Yr Athro Donna Mead OBE “Rydyn ni’n hapus iawn fod David wedi cytuno i ymuno â ni yn Felindre, ar ôl proses recriwtio gadarn a thra chystadleuol. Mae ganddo frwdfrydedd ac uchelgais dros Felindre a fydd yn dwyn budd i ni ar gyfer y dyfodol ac mae’n uniaethu’n gryf â’n cenhadaeth o gyflawni gwaith clinigol ac academaidd o safon fyd-eang. Daw David â phrofiad rhyngwladol hynod o berthnasol i’r Ymddiriedolaeth mewn gwasanaethau gwaed a chanser.”

Meddai David Donegan, “Braint yw cael fy newis i arwain y tîm yn Felindre ac rwy’n edrych ymlaen at gefnogi ein tîm i gyrraedd ei botensial llawn ac i gyflawni ein cydweledigaeth uchelgeisiol ar gyfer y dyfodol. Pan es i ymweld â Gwasanaeth Gwaed Cymru’n ddiweddar, fe wnaeth y croeso cynnes fy atgoffa o fy arddegau pan oeddwn i’n gweithio fel gwirfoddolwr gyda’r Groes Goch yn helpu rhoddwyr a’r staff gyda’r casgliadau. Pan es i ymweld â Chanolfan Ganser Felindre a gweld y dyluniadau ar gyfer y ganolfan newydd, cefais ymdeimlad go iawn o’r canlyniadau pwysig y byddwn ni’n eu sicrhau i bobl de ddwyrain Cymru dros y 5-10 mlynedd nesaf. Rwy’n edrych ymlaen yn fawr at gwrdd â staff, rhoddwyr, cleifion a phartneriaid dros y misoedd nesaf.”

Mae David yn gobeithio ymuno â’r Ymddiriedolaeth erbyn dechrau Rhagfyr.