Timau yng Ngwasanaeth Canser Felindre yn rhoi sgiliau atal heintiau ar brawf yn ystod yr Wythnos Ryngwladol Atal Heintiau

20 Hydref 2026

Mae timau ar draws Gwasanaeth Canser Felindre yn cymryd rhan mewn gweithgaredd unigryw i nodi Wythnos Ryngwladol Atal Heintiau 2026, ac i dynnu sylw at y rôl bwysig y mae pawb yn ei chwarae wrth gadw cleifion, ymwelwyr a chydweithwyr yn ddiogel.

Fel rhan o wythnos ymwybyddiaeth eleni, bydd y Tîm Atal a Rheoli Heintiau (IPC) yn cynnal Ystafell Ddianc IPC ryngweithiol yng Nghanolfan Ganser Felindre, Caerdydd, ar 20 a 21 Hydref. Bydd y profiad, sydd wedi'i gynllunio i fod yn ddiddorol ac i ysgogi’r meddwl, yn dod â dysgu pobl am atal heintiau yn fyw trwy her unigryw fel rhan o dîm.

Mae ystafell ddianc eleni yn adeiladu ar lwyddiant menter ymgysylltu staff flaenorol y tîm, Game of Stools, a gafodd ei datblygu fel cyfraniad Gwasanaeth Canser Felindre at Grŵp Dysgu Cydweithredol Clostridioides difficile (C. diff) Cymru dan arweiniad Partneriaeth Gofal Diogel Perfformiad a Gwella GIG Cymru.

Lledaenu gwybodaeth am atal heintiau

Fe wnaeth menter Game of Stools Gwasanaeth Canser Felindre ddenu mwy na 60 o staff trwy gemau a heriau rhyngweithiol wedi’u cynllunio i atgyfnerthu negeseuon allweddol ynghylch atal heintiau.

Gan fod cyfraddau C. difficile wedi aros yn gyson isel ar draws Gwasanaeth Canser Felindre, roedd y fenter yn canolbwyntio ar gynnal ymwybyddiaeth, hyder a pharodrwydd ymhlith staff drwy addysg, gan sicrhau bod timau'n parhau i fod yn barod i ymateb yn briodol pan fo amheuaeth o achosion.

Dangosodd y gwerthusiad fwy o hyder, ymwybyddiaeth a dealltwriaeth o egwyddorion atal a rheoli heintiau. Dywedodd y cyfranogwyr eu bod wedi ennill gwell dealltwriaeth o'r protocol SIGHT, mwy o hyder wrth adnabod dolur rhydd heintus a gwybod pa gamau i'w cymryd, yn ogystal â gwell ymwybyddiaeth o'u rôl wrth atal heintiau.

Gan adeiladu ar lwyddiant y fenter Game of Stools, mae'r Tîm Atal a Rheoli Heintiau (IPC) yn parhau i gyflwyno mentrau dysgu arloesol a deniadol fel rhan o’r Wythnos Ryngwladol Atal Heintiau.

Mae’r Ystafell Ddianc IPC, sydd yn cael ei chynnal ar 20 a 21 Hydref, yn cynnig ffordd ffres ac arloesol o ddysgu. Mae'r gweithgaredd yn annog staff i gydweithio wrth atgyfnerthu egwyddorion allweddol atal heintiau mewn ffordd hwyliog, ryngweithiol a chofiadwy. Mae hefyd yn hyrwyddo gwaith tîm, diogelwch cleifion ac ymrwymiad ar y cyd i atal heintiau.

Drwy gydol yr wythnos, bydd y Tîm Atal a Rheoli Heintiau (IPC) hefyd yn cynnal amrywiaeth o weithgareddau ymwybyddiaeth ac ymgysylltu yn yr Ardal Gwybodaeth i Gleifion. Bydd y gweithgareddau hyn yn rhoi cyfleoedd i staff, cleifion ac ymwelwyr ddysgu mwy am atal heintiau a'r rôl y mae pawb yn ei chwarae mewn cadw ein hamgylchedd gofal iechyd yn ddiogel.

Dywedodd Julianne Golding-Sherman, Uwch Nyrs IPC yn Ymddiriedolaeth GIG Prifysgol Felindre: "Mae atal heintiau yn gyfrifoldeb i bawb, ac mae'n chwarae rhan hanfodol mewn amddiffyn cleifion, ymwelwyr a chydweithwyr. Mae gweithgareddau fel yr Ystafell Ddianc yn ffordd hwyliog a diddorol i staff gryfhau eu gwybodaeth, cydweithio ac atgyfnerthu'r camau gweithredu syml sydd yn helpu i atal heintiau a chefnogi gofal diogel o ansawdd uchel.

Lleihau baich C. difficile drwy gydweithio

Mae’r Grŵp Dysgu Cydweithredol C. diff yn cefnogi timau byrddau iechyd ac ymddiriedolaethau ar draws GIG Cymru i nodi, gweithredu a chynnal gwelliannau sy'n lleihau nifer yr achosion a baich C. diff.

Drwy ddarparu cymorth i dimau ar gyfer gwella a newid ymddygiad, ynghyd â chyfleoedd i gydweithio a dysgu ar y cyd, nod y cydweithrediad yw gwreiddio gwelliannau cynaliadwy y gellir eu mabwysiadu a'u rhoi ar waith yn eang ar draws GIG Cymru.

Meddai Hayley Peters, Cyfarwyddwr Nyrsio Perfformiad a Gwella GIG Cymru: “Gall heintiau C. diff gael canlyniadau pellgyrhaeddol a difrifol i gleifion, eu hanwyliaid a’r system gofal iechyd. Gall pob haint arwain at niwed sy'n newid bywydau.

“Mae'r Grŵp Dysgu Cydweithredol C. diff wedi dod ag arbenigwyr o bob cwr o Gymru at ei gilydd i rannu, dysgu a gwella gyda’i gilydd. Mae'n galonogol gweld cyfranogwyr, gan gynnwys y tîm yn Felindre, yn adeiladu ar fentrau fel Game of Stools ac Ystafell Ddianc yr wythnos hon, i helpu i leihau effaith sylweddol C. diff ar gleifion a staff ar draws Cymru.” 

Ynghylch Gwasanaeth Canser Felindre

Mae Gwasanaeth Canser Felindre yn darparu gofal canser arbenigol i fwy na 1.5 miliwn o bobl ar draws de ddwyrain Cymru a thu hwnt. Fel rhan o Ymddiriedolaeth GIG Prifysgol Felindre, mae gwasanaethau’n cael eu darparu trwy fodel ‘prif ganolfan a lloerennau’, gyda Chanolfan Ganser Felindre yn gwasanaethu fel canolfan driniaeth, addysgu ac ymchwil arbenigol ar gyfer oncoleg anfeddygol.

Mae Gwasanaeth Canser Felindre yn darparu ystod eang o driniaethau, gan gynnwys cemotherapi, triniaethau gwrth-ganser systemig (SACT), radiotherapi a gofal lliniarol arbenigol. Drwy ddysgu, arloesi, ymchwil a gwella gwasanaethau, mae'r gwasanaeth wedi ymrwymo i ddarparu gofal o'r ansawdd uchaf i gleifion a theuluoedd ar draws Cymru.