Timau Felindre'n cyflawni rhaglen uwchraddio radiotherapi helaeth heb amharu'n fawr ar gleifion

25 Awst 2026

Mae timau ar draws Gwasanaeth Canser Felindre wedi cychwyn rhaglen helaeth lwyddiannus o uwchraddio ei fflyd a'i systemau radiotherapi, heb amharu'n fawr ar wasanaethau cleifion.

Dros dri mis, mae'r rhaglen wedi arwain at welliannau sylweddol i fflyd radiotherapi Varian yng Nghanolfan Canser Felindre yng Nghaerdydd ac yn Uned Radiotherapi Felindre @ Nevill Hall yn y Fenni. Bydd hefyd yn cryfhau'r gwasanaeth ar gyfer y dyfodol ac yn hybu'r gwaith o baratoi i symud i Ganolfan Canser Felindre newydd.

I gyflawni rhaglen o'r raddfa hon, roedd angen ymdrech enfawr gan y tîm, lle daeth cydweithwyr ynghyd o'r adrannau Radiotherapi, Ffiseg Radiotherapi, Gwasanaethau Digidol ac Ystadau, yn ogystal â'r tîm Gwasanaethau Radiotherapi Integredig (IRS), cyflenwyr a thimau clinigol ehangach.

Meddai Helen Payne, Rheolwr y Gwasanaethau Radiotherapi:

"Mae llwyddo i gyflawni'r rhaglen helaeth hon o uwchraddio, a chynnal gofal cleifion o ansawdd uchel ar yr un pryd, yn gamp nodedig. Dim ond trwy gynllunio manwl, cyfathrebu clir ac ymrwymiad gan dimau ar draws Felindre a'n partneriaid mae hyn wedi bod yn bosib. Er gwaethaf yr heriau o ran capasiti, rydyn ni wedi sicrhau bod cleifion yn parhau i gael gofal heb amharu'n fawr arnynt a chryfhau ein gwasanaethau ar gyfer y dyfodol."

Drwy gydol y rhaglen, cafodd cyflymyddion llinol eu tynnu allan o wasanaeth yn eu tro i ganiatáu i'r gwaith o uwchraddio ddigwydd. Er gwaethaf y gostyngiad hwn yn y capasiti o ganlyniad, gweithiodd y timau gyda'i gilydd i sicrhau bod cleifion yn parhau i gael eu triniaeth gyda chyn lleied o darfu â phosib.

Dangosodd staff hyblygrwydd aruthrol, gan weithio ar draws gwahanol safleoedd a helpu i gynnal sesiynau triniaeth ychwanegol ar y penwythnos pan oedd angen. Cyfrannodd y cleifion rôl bwysig hefyd, gan fynychu apwyntiadau naill ai yng Nghaerdydd neu yn y Fenni i helpu'r gwasanaethau i barhau i redeg yn ddi-dor yn ystod y cyfnod uwchraddio.

Gyda gwaith cynllunio, comisiynu a sicrhau ansawdd helaeth gan y tîm Ffiseg Radiotherapi, bydd yr uwchraddiadau'n gwella effeithlonrwydd, yn cryfhau gwydnwch gwasanaethau radiotherapi ac yn helpu'r gwasanaeth i symud i Ganolfan Ganser Felindre newydd.

Mae arbenigedd y tîm hefyd wedi denu cydnabyddiaeth genedlaethol. Yn ystod y rhaglen, gwahoddwyd aelodau o staff i rannu profiad Felindre o weithredu'r system Identify mewn Cyfarfod Defnyddwyr Varian UK yn Llundain, gan dynnu sylw at rôl flaenllaw'r sefydliad wrth gyflwyno technolegau newydd a gwella triniaeth canser i gleifion ledled Caerdydd, y Fenni a thu hwnt.