Penodi Pam Wenger yn Gyfarwyddwr Llywodraethu

13 Hydref 2026

Mae'n braf gan Ymddiriedolaeth GIG Prifysgol Felindre gyhoeddi mai Pam Wenger sydd wedi ei phenodi'n Gyfarwyddwr Llywodraethu newydd.

Mae Pam yn ymuno o Fwrdd Iechyd Prifysgol Betsi Cadwaladr, lle bu’n Gyfarwyddwr Llywodraethu Corfforaethol. Yn Weithiwr Proffesiynol Llywodraethu Siartredig, mae ganddi 30 mlynedd a mwy o brofiad ar draws y GIG yng Nghymru a Lloegr, yn ogystal ag yn y sector annibynnol.

Drwy gydol ei gyrfa, mae hi wedi arwain swyddogaethau llywodraethu, risg a chydymffurfiaeth, wedi cefnogi gwelliant sefydliadol ac wedi hyrwyddo diwylliannau cadarnhaol yn y gweithle.

Meddai Pam:

"Mae'n braf cael ymuno ag Ymddiriedolaeth GIG Prifysgol Felindre ac ymgymryd â'r rôl hon. Edrychaf ymlaen at weithio gyda chydweithwyr ar draws y sefydliad er mwyn gwneud penderfyniadau effeithiol, cryfhau ein trefniadau llywodraethu a helpu i gyflawni uchelgeisiau'r Ymddiriedolaeth ar gyfer cleifion, staff a chymunedau."

"Drwy gydol fy ngyrfa, rydw i wedi bod yn frwd dros greu diwylliannau sy'n rhoi gwerth, cymorth a grym i bobl, a lle mae gwerthoedd fel tosturi, cynhwysiant a pharch yn llywio'r ffordd rydyn ni'n gweithio a'r gofal rydyn ni'n ei ddarparu."

Meddai Carl James, Prif Weithredwr Ymddiriedolaeth GIG Prifysgol Felindre:

"Hoffwn i longyfarch Pam am gael ei phenodi ac edrychaf ymlaen at ei chroesawu i'r Ymddiriedolaeth yn ddiweddarach eleni.

"Mae gan Pam brofiad helaeth o bob rhan o'r GIG a'r sector annibynnol, ynghyd â hanes cryf o gefnogi sefydliadau trwy brosesau llywodraethu a sicrwydd effeithiol. Bydd ei harbenigedd yn helpu'r Ymddiriedolaeth wrth i ni barhau i ddatblygu a gwella ein gwasanaethau i gleifion, staff a chymunedau."