Y newyddion diweddaraf ar y sesiynau galw heibio i breswylwyr Ysbyty'r Eglwys Newydd
Dydy'r cynnwys hwn ddim ar gael yn Gymraeg yn anffodus. Gweler y fersiwn Saesneg.
Diolch i'r bron i 50 o drigolion a fynychodd ein sesiynau galw heibio diweddar i drafod dyfodol safle Ysbyty'r Eglwys Newydd.
Mae'r tîm yn gwerthfawrogi'r amser, y cwestiynau a'r mewnwelediadau a rannwyd, ac roedden ni eisiau crynhoi rhai o'r materion sy'n bwysig i chi pan fyddwn ni'n ystyried mynegiadau o ddiddordeb.
Rydym wedi ymrwymo i fod yn agored ac yn dryloyw cymaint â phosibl drwy gydol y broses hon. Rydym yn gobeithio y bydd y clipiau hyn o ddiddordeb i chi, ac os oes gennych unrhyw gwestiynau, cysylltwch â'r tîm drwy e-bostio contact.velindre@wales.nhs.uk, neu rhowch sylwad isod.
Defnyddio’r safle a chynllunio ar gyfer y dyfodol
Pam na ellid cadw'r safle at ddefnydd y GIG?
Nid yw adeiladau hen Ysbyty’r Eglwys Newydd yn addas bellach ar gyfer gwasanaethau clinigol modern, ac nid ydy’r safle’n addas ar hyn o bryd ar gyfer unrhyw weithgareddau neu wasanaethau y gallai’r GIG fod eu hangen. Fel rhan o'n gwaith cynllunio parhaus ar yr ystâd, mae'r Ymddiriedolaeth yn canolbwyntio ar fuddsoddi ar gyfleusterau gofal iechyd modern, pwrpasol, gan gynnwys ein Canolfan Ganser Felindre newydd sydd i fod i agor yn Nhymor y Gwanwyn 2027.
Pam nad yw safle’r Eglwys Newydd a safle presennol Canolfan Ganser Felindre yn cael eu hystyried gyda'i gilydd?
Mae'r ddau safle mewn gwahanol gamau, ac mae ganddyn nhw berchnogaeth a llwybrau datblygu gwahanol.
A ddylai'r prosiect aros am y Cynllun Datblygu Lleol newydd?
Mae amseriad y prosiect yn cael ei drafod gyda Chyngor Caerdydd, gyda chynrychiolwyr o'r cyngor yn bresennol yn y sesiwn galw heibio ddiweddar. Rydym yn cydnabod pwysigrwydd cyd-fynd â'r CDLl sy'n dod i'r amlwg, ac rydym eisiau sicrhau hefyd nad yw'r safle'n parhau i fod heb ei ddefnyddio am fwy o gyfnod nag sydd angen.
Tai, dwysedd a darpariaeth fforddiadwy
Pryderon ynghylch màs a dwysedd
Rydym yng ngham cyntaf proses hir, ac nid oes unrhyw gynigion terfynol wedi'u cytuno eto. Mae'r adborth a rannwyd yn y sesiynau galw heibio yn adlewyrchu'r angen i gydbwyso'r angen am dai, yr effaith ar y gymuned a chynllunio ehangach.
Pa ganran fydd yn dai fforddiadwy?
Bydd gofynion tai fforddiadwy yn cael eu gosod trwy broses gynllunio Cyngor Caerdydd. Disgwylir i unrhyw ddatblygwr yn y dyfodol fodloni'r gofynion hynny.
Traffig, mynediad a gwasanaethau lleol
A fydd traffig yn cynyddu gydag un ffordd fynediad yn unig?
Mae effaith traffig yn fater allweddol y byddai angen ei asesu'n llawn fel rhan o unrhyw gais cynllunio.
Pwysau ar feddygon teulu a gwasanaethau lleol
Rydym yn cydnabod y pryderon ynghylch capasiti gwasanaethau lleol. Mae rhanddeiliaid ehangach Cyngor Caerdydd yn ystyried y materion hyn fel rhan o'r broses gynllunio ar gyfer pob datblygiad mawr.
Tryloywder a phartneriaethau
Pwy sydd wedi bod yn rhan hyd yn hyn a phwy fydd yn rhan o hyn yn y dyfodol?
Mae gwaith archwiliadol cynnar wedi cael ei wneud gan ymgynghorwyr arbenigol i lywio'r camau dichonoldeb cychwynnol. Mae Felindre wedi dod ag ystod eang o randdeiliaid ac arbenigwyr at ei gilydd i'n harwain ni i'r cam cyntaf hwn o'r broses.
Pwy fydd yn arwain unrhyw werthiant, a sut fydd gweithio mewn partneriaeth yn cael ei sicrhau?
Bydd unrhyw werthiant yn y dyfodol yn dilyn canllawiau'r GIG a'r Llywodraeth, gyda phwyslais ar gyflawni gwerth cyhoeddus a sicrhau y gall y datblygwr weithio'n effeithiol gyda phartneriaid lleol.
Clybiau chwaraeon
Clybiau chwaraeon a hyd y brydles
Rydym yn deall pwysigrwydd sefydlogrwydd yn llawn i'r clybiau chwaraeon a'u pwysigrwydd i'r gymuned ehangach. Byddwn yn parhau i weithio'n agos gyda'r clybiau chwaraeon, y mynychodd rhai ohonynt y sesiynau galw heibio, fel rhan o'r broses. Mae pwysigrwydd y clybiau chwaraeon yn cael ei bwysleisio yn y deunyddiau a ddarperir i unrhyw ddatblygwr posibl.
Y camau nesaf
Mae'r sesiwn galw heibio nesaf i breswylwyr wedi'i drefnu ar gyfer 3 Chwefror rhwng 5pm a 6pm yn adeilad Noddfa ar 19 Heol y Parc.