Lansio ein Strategaeth Nyrsio gyntaf erioed

25 Mai 2023

Mae Ymddiriedolaeth GIG Prifysgol Felindre yn falch o fod wedi lansio ei Strategaeth Nyrsio gyntaf erioed.

Mae Strategaeth yr Ymddiriedolaeth gyfan wedi ei datblygu gyda’n nyrsys a bydd yn eu grymuso i arwain yn dosturiol ac i ddarparu’r gofal gorau i’n cleifion ac i’n rhoddwyr.

Ei dri nod yw:

• Bydd nyrsys yn gwrando ar gleifion (eu gofalwyr) a rhoddwyr ac yn darparu gofal caredig, diogel ac effeithiol sy’n seiliedig ar dystiolaeth.
• Bydd nyrsys yn datblygu ein gwybodaeth a’n sgiliau. Byddwn ni’n hybu diogelwch seicolegol yn ein timau i greu gweithlu sy’n addas at y dyfodol.
• Bydd nyrsys yn gwneud y mwyaf o gyfleoedd o ran ymchwil, arloesi a gwelliant parhaus.

Meddai Nicola Williams, Cyfarwyddwr Gweithredol Nyrsio, Gweithwyr Proffesiynol Perthynol i Iechyd a Gwyddor Iechyd yn yr Ymddiriedolaeth:

“Roeddem yn teimlo ei bod yn bwysig nodi ein gweledigaeth ar gyfer nyrsio yn yr Ymddiriedolaeth a ble rydym am weld ein maes nyrsio yn y tair blynedd nesaf. Mae’r Safonau Nyrsio eisoes wedi eu gwreiddio’n dda iawn ar draws y ffordd rydym yn gweithio, fodd bynnag mae’r Strategaeth yn mynd hyd yn oed ymhellach i nodi beth yw ein nodau a sut byddwn yn cyrraedd yno.”

Meddai Tina Jenkins, Pennaeth Diogelu a Grwpiau Agored i Niwed yr Ymddiriedolaeth:

“Roeddem yn awyddus iawn i sicrhau bod y strategaeth hon yn cael ei datblygu gan nyrsys ar gyfer nyrsys. Mae’n gyfnod anodd i’n proffesiwn nyrsio ac rydym wedi ymrwymo i wneud yn siŵr fod Ymddiriedolaeth GIG Prifysgol Felindre yn sefydliad sy’n denu nyrsys.”

Lansiwyd y Strategaeth yng Nghynhadledd Nyrsio arbennig yr Ymddiriedolaeth yng Nghanolfan yr Holl Genhedloedd yng Nghaerdydd ar Ddiwrnod Rhyngwladol Nyrsys.

Roedd y digwyddiad yn gyfle i nyrsys o Wasanaeth Gwaed Cymru, Canolfan Ganser Felindre a’r Ymddiriedolaeth ei hun ddathlu llwyddiannau’r gorffennol ac edrych ymlaen at gyraeddiadau’r dyfodol.

Roedd y diwrnod yn cynnwys araith gyfeirnod gan Sue Tranka, Prif Swyddog Nyrsio Cymru, yn ogystal â sesiwn i rymuso nyrsys i arwain gyda thosturi a gweithdy yn hyrwyddo diogelwch seicolegol staff, ymhlith eraill.

Daw hyn lai na blwyddyn ar ôl lansio Safonau Nyrsio'r Ymddiriedolaeth, sy'n rhan ganolog o'r Strategaeth.

Cytunwyd ar y rhain yn dilyn cyfnod o ymgynghori ar draws yr Ymddiriedolaeth ac maent yn nodi'r safonau y maes disgwyl i’n nyrsys eu cyrraedd.

Mae'r Ymddiriedolaeth yn falch iawn o'n nyrsys cofrestredig ac anghofrestredig sy'n darparu gofal a'r gwasanaethau rhagorol i'n cleifion a'n rhoddwyr.