Croeso i Uned Radiotherapi Felindre yn Ysbyty Nevill Hall

A hithau'n agor yn 2025, bydd ein Huned Radiotherapi newydd gwerth £38 miliwn yn Nevill Hall yn cynyddu ein gallu i ddarparu gwasanaethau radiotherapi i gleifion de-ddwyrain Cymru.

Beth sy'n cael ei gynnig:

Dau beiriant Linac manylach: Bydd y peiriannau hyn o'r radd flaenaf ac yn darparu triniaethau radiotherapi manwl ac effeithiol.
Gwaith cynllunio radiotherapi: Cynlluniau triniaeth wedi'u teilwra i ddiwallu'ch anghenion penodol.
Adolygu yn ystod triniaeth: Monitro rheolaidd ar eich cynnydd ac addasu triniaethau yn ôl yr angen.
Addysg ar driniaeth: Gwybodaeth a chymorth i'ch helpu i ddeall eich triniaeth a rheoli sgil effeithiau.
Efelychydd CT: Delweddu uwch i sicrhau bod triniaeth yn cael ei chyflwyno'n gywir.

Pam mae'r ganolfan hon yn bwysig:

Ein nod yw creu cyfleuster o safon fyd-eang sy’n cynnig gofal o ansawdd uchel i gleifion canser yn ne-ddwyrain Cymru. Unwaith y bydd yn gwbl weithredol, bydd yr Uned Radiotherapi yn Nevill Hall yn creu 20% yn fwy o gapasiti i ni allu darparu triniaethau radiotherapi. Wedi'i staffio gan dîm ymroddedig o arbenigwyr Gwasanaeth Canser Felindre, bydd yr Uned yn gweithredu fel estyniad i Ganolfan Ganser Felindre yn yr Eglwys Newydd.

Manteision i chi:

Mynediad at driniaeth: Mae gallu cynyddol yn golygu y dylech allu dechrau eich triniaeth yn gynt.
Gofal cynhwysfawr: Cewch fynediad at ystod lawn o wasanaethau radiotherapi o dan un to.
Cymorth ac addysg: Cewch yr wybodaeth a'r cymorth sydd eu hangen arnoch trwy gydol eich triniaeth.

Ar gyfer pwy mae hwn?

Bydd Uned Radiotherapi Felindre yn Ysbyty Nevill Hall yn gwella gallu Gwasanaeth Canser Felindre i ddarparu radiotherapi, a’n helpu i weld mwy o gleifion bob wythnos. Bydd y gwasanaeth yn dwyn budd i gleifion o dde-ddwyrain Cymru sy’n cael eu cyfeirio at Wasanaeth Canser Felindre am eu triniaeth radiotherapi.

I ddechrau, bydd yr uned yn trin cleifion canser y fron, canser y prostad a chleifion radiotherapi lliniarol sy’n ateb meini prawf clinigol. Mae’n bosibl y bydd yr uned yn trin cleifion gyda mathau eraill o ganser yn ddiweddarach.

Bydd cleifion sy’n cael eu cyfeirio at Wasanaeth Canser Felindre’n cael apwyntiad naill ai yng Nghanolfan Ganser Felindre yn yr Eglwys Newydd neu yn Uned Radiotherapi Felindre yn Ysbyty Nevill Hall.

Bydd y penderfyniad ynglŷn â ble bydd cleifion yn mynd yn seiliedig ar dri phrif ffactor:

Angen meddygol: Mae pob claf sy'n cael ei gyfeirio am radiotherapi gyda ni'n wahanol. Ar ôl eich cyfeirio i'n gofal, byddwn yn asesu eich anghenion meddygol ac yn eich neilltuo i'r lleoliad sydd fwyaf addas i chi.
Argaeledd apwyntiadau: Ein blaenoriaeth yw helpu cleifion i ddechrau eu triniaeth cyn gynted ag y gallwn. Mae hyn yn golygu y byddwch yn cael cynnig triniaeth yn y lleoliad fydd yn gallu eich gweld yn gyntaf.
Lleoliad: Pan fydd apwyntiadau ar gael yn y Ganolfan Ganser yn yr Eglwys Newydd ac yn yr Uned Loeren Radiotherapi yn Nevill Hall, byddwn yn ceisio eich cyfeirio at yr un sydd agosaf at eich cartref.

Ein hymrwymiad:

Rydym yn ymroddedig i weithio gyda byrddau iechyd yn ne-ddwyrain Cymru i sicrhau eich bod yn cael y gofal gorau posibl. Mae'r ganolfan hon yn rhan o'n hymdrech barhaus i wella gwasanaethau canser a chanlyniadau i'n cymuned.

Edrych ymlaen:

Mae disgwyl i'r Uned Radiotherapi agor erbyn haf 2025. Rydym yn edrych ymlaen at ddod â gwasanaethau gwell atoch a'ch helpu wrth i chi wella.

Os oes gennych unrhyw gwestiynau neu os oes angen mwy o wybodaeth arnoch, mae croeso i chi estyn allan. Rydym yma i'ch helpu chi bob cam o'r ffordd.

Cyrraedd Uned Radiotherapi Felindre yn Nevill Hall

Ysbyty Nevill Hall
Ffordd Aberhonddu
Y Fenni
NP7 7EG

Yn y car: Edrychwch ar Google Maps am gyfarwyddiadau. Mae parcio ar y safle ar gael i gleifion sy'n cael radiotherapi.

Ar fws: Gweld: Amseroedd Bysiau

Traveline Cymru – Fy Nhaith Iechyd