Neidio i'r prif gynnwy

Gwasanaeth Gwaed Cymru

Profiad y rhoddwyr

Yng Ngwasanaeth Gwaed Cymru, rydyn ni bob amser yn ceisio dysgu o'ch profiadau. I wneud yn siŵr fod y broses o roi adborth yn syml, rydyn ni'n defnyddio ein system arolygu mewn dwy ffordd:

• Tabledi/llechi llaw ym mhob sesiwn rhoddwr

• Codau QR hawdd sy'n cysylltu ag arolygon ar-lein

Rydyn ni'n rhannu canlyniadau pob arolwg gyda’n tîm arwain a’n hadrannau, yn ogystal ag yn ein hadroddiadau chwarterol a blynyddol. Drwy wrando arnoch chi, gallwn ni ddathlu llwyddiannau, gweld meysydd lle gallwn ni wneud yn well, a chynllunio ffyrdd newydd o wella ein gwasanaethau.

Edrychwn ar y themâu cyffredin yn yr holl adborth a defnyddiwn yr wybodaeth honno i fynd i'r afael â phryderon. Trwy glywed gan ein rhoddwyr, gallwn ni wneud newidiadau ystyrlon sy'n adlewyrchu eich anghenion a'ch profiadau.

Delwedd sy’n dangos adborth ynglŷn â’ch profiad: 98% o foddhad, 100% cyfeillgar a chroesawgar, 100% llawn cymorth a gwybodaeth a 100% tosturiol a gofalgar.

 

Dywedodd 2% o'r rhoddwyr a roddodd adborth trwy CIVICA eu bod yn anfodlon â'u profiad.

Yn seiliedig ar yr adborth a dderbyniwyd, mae rheolwyr gweithredol wedi:

  • Adolygu glendid yr unedau rhoddi symudol i wneud yn siŵr fod safon uchel o lanweithdra yn cael ei chynnal bob amser.
  • Helpu'r staff i ddysgu Cymraeg.
  • Darparu gwresogyddion symudol ar gyfer y timau casglu.
  • Cynnal adolygiad llawn o leoliadau i wneud yn siŵr nad oes unrhyw broblemau fyddai'n effeithio ar brofiad y rhoddwyr.

 

Wal Ddiolchgarwch Gwasanaeth Gwaed Cymru

Bob mis mae tudalen fewnrwyd ein Wal Diolchgarwch yn cael ei diweddaru gyda'r negeseuon caredig diweddaraf sydd wedi eu rhannu â ni gan roddwyr. Mae'r negeseuon yn cydnabod y gwahaniaeth anhygoel y mae ein staff yn ei wneud.

Casgliad o adborth cadarnhaol gan gleifion mae timau o bob rhan o

 

Cwynion

Rydyn ni bob amser yn ceisio darparu'r gwasanaeth gorau posibl, ond rydyn ni'n gwybod weithiau na fydd pethau'n mynd cystal ag y dylen nhw. Os ydych chi'n anhapus ag unrhyw ran o'n gwasanaeth, rydyn ni am glywed gennych chi - mae eich adborth yn ein helpu ni i wella.

Gallwch godi pryder:

• Trwy siarad â ni wyneb yn wyneb

• Dros y ffôn neu lythyr

• Gyda chymorth ein tîm os oes angen

 

Rydym yn dilyn canllawiau Gweithio i Wella Cymru, sy’n golygu:

• Byddwn ni'n cydnabod eich pryder yn gyflym

• Byddwn ni'n edrych i mewn i beth ddigwyddodd yn drylwyr

• Byddwn ni'n agored ac yn glir ynghylch beth byddwn ni'n ei ddarganfod

• Byddwn ni'n dweud wrthych beth rydyn ni'n ei wneud i wella pethau

Rhwng mis Hydref a mis Rhagfyr 2024, cawsom ni 11 o gwynion - sy'n hafal i ryw 0.05% o roddwyr. Er mai nifer fach yw hwn, mae pob pryder yn bwysig i ni ac maen nhw'n ein helpu i ddysgu sut i wella ein gwasanaeth.

 

 

  • Cafodd 11 o gwynion eu trin fel datrysiad cynnar - o fewn 2 ddiwrnod gwaith
  • Cafodd 0 cwyn eu trin yn ffurfiol o dan reoliadau Gweithio i Wella Cymru
  • Cafodd 0 cwyn eu hail-agor, gan ddangos bod cwynion yn cael eu trin yn foddhaol.

 

Rydyn ni wedi bod yn gwrando ar eich pryderon ac wedi gwneud newidiadau allweddol i wella eich profiad fel rhoddwr:

  • Mae rheolwyr gweithredol yn gwneud yn siŵr, pan fydd oedi cyn dechrau sesiwn rhoi, bod staff yn cysylltu â'r rhoddwyr sydd ag apwyntiad yn ddiweddarach yn y dydd, pan fydd hynny'n bosibl, i symud apwyntiadau a lleihau'r anghyfleustra i roddwyr a gweithio gyda staff i wella eu harddull a dull cyfathrebu pan fydd apwyntiadau rhoddwyr yn cael eu symud.
  • Mae rheolwyr gweithredol yn atgoffa'r staff o bwysigrwydd:
    • ymddygiad proffesiynol
    • bod yn agored ac yn onest wrth gyfathrebu'n effeithiol gyda'n rhoddwyr pan fydd gwallau'n digwydd.
  • Mae'r Tîm Casglu'n parhau i gydweithio â'r Tîm Cynllunio i edrych ar leoliadau amgen ar draws y gwasanaeth, yn enwedig yn y gogledd

 

Digwyddiadau

Gwneud yn siŵr fod pawb yn aros yn ddiogel yw ein prif flaenoriaeth. Dyna pam rydyn ni'n annog ein staff i adrodd am unrhyw ddigwyddiadau—neu ddamweiniau agos—drwy ein system rheoli digwyddiadau. Unwaith i ddigwyddiad gael ei adrodd, byddwn ni:

• yn ymchwilio i beth ddigwyddodd ar unwaith

• yn mynd i'r afael ag unrhyw bryderon uniongyrchol

• yn nodi ac yn trwsio unrhyw achosion sylfaenol i'w atal rhag digwydd eto

Rydyn ni hefyd yn rhannu’r pethau rydyn ni wedi eu dysgu gyda’r sefydliad cyfan ac yn olrhain tueddiadau i helpu i sbarduno gwelliannau. Pan fydd rhywbeth yn arwain at niwed cymedrol neu fwy difrifol, byddwn ni'n cymryd golwg agosach fyth, gan gynnal adolygiad ac ymchwiliad manwl i wneud yn siŵr ein bod ni'n gwneud popeth o fewn ein gallu i gadw ein rhoddwyr a’n staff yn ddiogel.